IV ROMARÍA POP DAS LETRAS

Como cada ano, unha das actividades dentro da programación para a celebración das Letras Galegas é a nosa ROMARÍA POP. Desde o ano pasado imos pasar a mañá á igrexa de O Souto onde realizamos diversas actividades desfrutando dun día de convivencia na contorna próxima con moita arte, cultura, tradición e lingua galega.

Este ano dedicábase o día das Letras Galegas á poesía popular oral, personificado nunha serie de mulleres cantareiras e pandeireteiras como foron Adolfina e Rosa Casás Rama (Cerceda), Eva Castiñeira (Muxía) e as pandeireteiras de Mens (Malpica).

Durante semanas atrás estivemos coñecendo o nome dalgunhas gracias aos xogos de Lerouchiño, a mascota da nosa biblioteca.

Fomos de camiñata á Igrexa, unha vez alí distribuímonos por zonas e comezamos coa primeira actividade, un obradoiro para crear unha pandeireta e despois decorámola.

 Ao rematar, merendamos e fixemos un obradoiro para aprender a tocar a pandeireta e outro obradoiro para aprender pasos de baile tradicional galego. No noso cole hai moita arte e as nenas e nenos que saben tocar e bailar foron elas e eles os que nos ensinaron.

Os compis de 6ºEP leron un manifesto moi cantareiro e regueifeiro que nos falaba das homenaxeadas.

Despois tivemos actuacións musicais por parte das alumnas e alumnos do cole. Que ben tocan, cantan e bailan!

E como broche final da xornada, cantamos a cantiga "A Danza" de Eva Castiñeira que nos ensinara previamente María, a mestra de música.

Que día tan fermoso!

Vivan as cantareiras e viva a cultura e a lingua galega!